Deputeti i Lidhjes Demokratike të Kosovës (LDK), Anton Quni tha se mungesa e ushqimit për ushtrinë është shqetësim thelbësor që prekë jo vetëm sigurinë kombëtare të vendit tonë, por edhe shëndetin dhe mirëqenien e ushtarakëve.

Ai tha se është detyrë parësore e Ministrisë së Mbrojtjes të sigurojë mirëqenien për ushtarët dhe të tregojë kujdes e përkushtim të lartë për të siguruar kushtet të përshtatshme për operimin e mbarëvajtjen e të gjitha proceseve.

Sipas tij, është thelbësore që Ministria e Mbrojtjes të sigurojë që proceset e prokurimit për Forcën e Sigurisë së Kosovës të jenë në përputhje me parimet e standardet me të larta.

“Prandaj nga përvojat e vendeve anëtare të NATO-s, ku Kosova synon anëtarësimin është e papranueshme që një procedurë kaq e rëndësishme si ajo e ushqimit të shpërfaqë shkeljet elementare ku procedura të tilla fillimisht klasifikohen sekrete e pastaj si procedurë ekstreme emergjente në kundërshtim të plotë me legjislacionin e praktikat e mira të ministrive të mbrojtjes së shteteve demokratike”, u shpreh ai.

Deputeti i LDK-së theksoi që nëse shtetet e  fuqishme ushtarake si SHBA e Mbretëria e Bashkuar, por edhe vendet fqinje mund të ndjekin procese të hapura, atëherë cilat mund të jenë motivet e arsyet që Kosova të veprojë ndryshe.

“Përtej aspekteve të transparencës e konkurrencës, NATO-ja ka vendosur standarde të qarta dhe të rrepta për ushqimin e forcave të saj të cilat synojnë tua ofrojnë ushtarëve ushqim të shëndetshëm e përshtatshme të sigurt për nevojat e operacione. Standardi NATO-s për siguri ushqimore përshkruan qartë se çfarë duhet të përmbajë një racion për të siguruar që çdo ushtarë të merr kaloritë, proteinat karbohidratet dhe yndyrat e nevojshme për të përballuar kushtet gjatë operacioneve apo ushtrimeve fushore, por edhe në beteja”, shtoi Quni.

Ai tha se kjo qasje jo vetëm që rrezikon shëndetin e ushtarëve tanë , por përfshinë pasoja strategjike lidhur me aftësinë tonë për të përmbushur detyrimet ndërkombëtare dhe për të mbrojtur sigurinë kombëtare./Arbresh.info/